Edhe këtë vit, më 28 qershor, Dragashi do të mbushet me energji, ngjyra dhe atmosferë festive, teksa qindra çiklistë pritet të bashkohen në marshin tradicional me rastin e Ditës së Çlirimit të Komunës së Dragashit.

I organizuar nga Klubi i Çiklizmit Opoja në bashkëpunim me Komunën e Dragashit, ky aktivitet tashmë është shndërruar në një nga ngjarjet më të veçanta sportive, duke bashkuar sportdashës, familjarë dhe qytetarë të të gjitha moshave. Pjesëmarrësit do të përshkojnë rreth 15 kilometra nëpër peizazhet mahnitëse të Dragashit, mes ajrit të pastër, natyrës së gjelbër dhe pamjeve karakteristike të Sharrit. Në këtë rrugëtim do të marrin pjesë çiklistë nga komuna jonë, por edhe nga shumë qytete të Kosovës, duke e kthyer Dragashin në qendrën e çiklizmit për një ditë.

Më shumë se një aktivitet sportiv, ky marsh është një simbol i bashkimit, respektit për historinë dhe promovimit të një jetese aktive e të shëndetshme. Muzika, entuziazmi rinor, buzëqeshjet dhe energjia pozitive do ta shoqërojnë çdo kilometër të rrugës, duke krijuar një atmosferë të paharrueshme për të gjithë pjesëmarrësit.