Klubi i Çiklizmit Opoja (KÇ Opoja) që nga themelimi ka për qëllim organizimin e aktiviteteve të ndryshme sportive brenda komunës së Dragashit me çiklistë. Ky klub jo vetëm që promovon sportin e çiklizmit si një aktivitet jetik për shëndetin fizik dhe mendor të njerëzve, por gjithashtu synon përhapjen e kulturës së çiklizmit në komunitetin tonë. Është themeluar për herë të parë në vitin 2018 dhe prej atëherë e deri më sot ka organizuar dhjetëra manifestime dhe gara të ndryshme brenda territorit të komunës së Dragashit, si dhe anëtarët e këtij grupi kanë marrë pjesë në shumë manifestime dhe organizime në mbarë Kosovën dhe më gjerë.

Me përkushtimin tonë për të informuar dhe trajnuar të rinjtë, ne shpresojmë të nxisim përdorimin e biçikletave për një mjedis më të pastër dhe më pak të ngarkuar me trafik. Duke e bërë këtë, ne synojmë të ndikojmë pozitivisht në cilësinë e jetës së përditshme, duke reduktuar ndotjen e ajrit dhe rritjen e ndërgjegjësimit për përfitimet e lëvizjes së qëndrueshme.

Në përmirësimin e infrastrukturës dhe shtigjeve për çiklistët, ne dëshirojmë të krijojmë hapësira të sigurta dhe të lehta për përdorim nga të gjithë çiklistët, qoftë ata të rinj apo të rritur. Kjo përfshin zhvillimin e rrugëve të dedikuara për çiklizëm, sinjalizimin e duhur dhe vendet e pushimit përgjatë shtigjeve.

Përveç kësaj, ne promovojmë pjesëmarrjen në aktivitetet e organizuara brenda dhe jashtë territorit të Kosovës si një mënyrë për të rritur lidhjet sociale dhe bashkëpunimin ndërmjet çiklistëve të ndryshëm. Kjo na jep mundësinë të mësojmë nga eksperiencat e njëri-tjetrit dhe të zhvillojmë më tej aftësitë tona çiklistike.